$60/kg 約 $65~$80/隻
多謝朋友仔作品~懶人豬手攞命汁~
主要材料:
•西班牙 Batalle 黑豚生豬踭
•洋蔥一個，切片
•薑一舊，刮皮，拍扁
•蒜頭/乾蔥隨自己喜歡的份量
•史X生雞湯1公升（參考份量）
•預備自己喜歡的香料包，香料好隨意，呢度用咗花椒、八角、桂皮、香葉，全部少少，入茶袋。
做法:
1. 豬踭解凍洗淨，汆水，取出再洗淨。
2. 洋蔥、薑、蒜頭、乾蔥，舖飯煲底，放豬踭，放香料包，注入雞湯到豬踭2/3高度，加一舊冰糖（大概兩隻手指公咁大），係咁易加一湯匙生抽，冚飯煲蓋，㩒煲飯掣。
3. 抖下、飲下咖啡、食下cheesecake。
4. 電飯煲彈掣，開蓋，小心蒸氣，將豬踭反轉，啲雞湯應該少咗，加番少少又去番豬踭2/3高度，冚飯煲蓋，㩒煲飯掣。
5. 飲杯水，食下蛋撻。
6. 電飯煲彈掣，開蓋，小心蒸氣，啲雞湯應該又少咗，又加番少少去番豬踭2/3高度，冚飯煲蓋，㩒煲飯掣。
7. 電飯煲彈掣，開蓋，搵隻筷子篤一篤隻豬踭，應該唔用力都篤得入。
8. 搞掂！
tips:
a. 配料只是參考，可自行加減，例如不喜歡八角，可以不加，喜歡洋蔥，可加多些。
b. 雞湯份量以1公升為上限，如果你的電飯煲較小，有機會用不完1公升，但如果你的電飯煲很大，1公升雞湯不夠，而步驟4和6仍未夠2/3高度，就加清水，否則太鹹。
c. 以上是以Ed’s 店的豬踭來做，如果你手上的是已醃鹹的豬踭，不要用雞湯，否則太鹹。
後記:
-全家人都話好好食，豬皮入口即溶，連永不吃豬皮嗰兩個都搶住食，肉質極鬆化。
-薑都入埋味，後悔落太少薑。
-啲汁送飯超攞命，後悔煮太少飯，我哋要再煮公仔麵撈啲汁。